വിന്നിപെഗിലെ സെൻ്റ് ബോണിഫേസ്  ആശുപത്രിയിൽ ചികിത്സാ പ്രതിസന്ധി രൂക്ഷം; അത്യാഹിത വിഭാഗത്തിൽ രോഗികളുടെ നീണ്ട ക്യൂ

കാനഡയിലെ വിന്നിപെഗിലുള്ള സെൻ്റ് ബോണിഫേസ് ആശുപത്രിയിൽ അടിയന്തര ചികിത്സാ സൗകര്യങ്ങൾ ലഭിക്കാതെ രോഗികൾ വലയുന്നതായി റിപ്പോർട്ട്. ആശുപത്രിയിലെ അത്യാഹിത വിഭാഗത്തിൽ ചികിത്സ തേടിയെത്തുന്നവരുടെ എണ്ണം റെക്കോർഡ് നിലയിലെത്തിയതായും കാത്തിരിപ്പ് സമയം അപകടകരമാം വിധം വർദ്ധിച്ചതായും ഡോക്ടർമാർ മുന്നറിയിപ്പ് നൽകുന്നു.

 കഴിഞ്ഞ തിങ്കളാഴ്ച മാത്രം ഏകദേശം 75 പേരാണ് ഒരേസമയം ചികിത്സയ്ക്കായി കാത്തുനിന്നത്. ഇത് ആശുപത്രിയുടെ ചരിത്രത്തിലെ തന്നെ ഏറ്റവും ഉയർന്ന നിരക്കാണെന്നാണ് കരുതപ്പെടുന്നത്. ചില രോഗികൾക്ക് ഡോക്ടറെ കാണാൻ 20 മണിക്കൂറിലധികം വരി നിൽക്കേണ്ടി വന്നു. നീണ്ട കാത്തിരിപ്പ് ഇപ്പോൾ ഒരു സാധാരണ കാര്യമായി മാറിക്കഴിഞ്ഞുവെന്നും ഇത് രോഗികളുടെ ജീവന് ഭീഷണിയാണെന്നും ഡോക്ടർമാർ ചൂണ്ടിക്കാട്ടുന്നു.

ആശുപത്രിയിലെ വാർഡുകളിൽ ഒഴിവില്ലാത്തതിനാൽ എമർജൻസി വിഭാഗത്തിൽ നിന്ന് രോഗികളെ മാറ്റാൻ കഴിയാത്തതാണ്  പ്രതിസന്ധിക്ക് പ്രധാന കാരണം. കഴിഞ്ഞ ബുധനാഴ്ച ലഭ്യമായ 64 ചികിത്സാ ഇടങ്ങളിൽ 52 എണ്ണവും വാർഡുകളിലേക്ക് മാറാൻ കാത്തിരിക്കുന്ന രോഗികളെക്കൊണ്ട് നിറഞ്ഞിരുന്നു. ഇതിനാൽ പുതിയതായി എത്തുന്ന അത്യാഹിത കേസുകൾക്കായി വെറും 12 ബെഡുകൾ മാത്രമാണ് ബാക്കിയുണ്ടായിരുന്നത്.

ബെഡുകളുടെ കുറവ് മൂലം വരാന്തകളിലും വെയിറ്റിംഗ് റൂമുകളിലും കിടത്തിയാണ് പലർക്കും ചികിത്സ നൽകുന്നത്. പ്രായമായവർക്കും ഗുരുതരാവസ്ഥയിലുള്ളവർക്കും ഇത് ഏറെ പ്രയാസമുണ്ടാക്കുന്നുണ്ട്. സ്ഥിതി പരിഹരിക്കാൻ കൂടുതൽ ഡോക്ടർമാരെയും ബെഡുകളും അനുവദിച്ചിട്ടുണ്ടെന്നും ആരോഗ്യവകുപ്പ് അറിയിച്ചു.